Wat ass d’CampuS-Team?
D’CampuS-Team Helperknapp ass d’lokal Versioun vum nationale Projet S-Team (www.s-team.lu). D’Kanner, déi Member vum CampuS-Team ginn, kréien eng kontinuéierlech Ausbildung während dem Joer zu den Theme Participatioun, Gewaltpräventioun an Zivilcourage. Si entwéckelen och Aktioune fir d’Zesummeliewen, d’Wuelbefanne an d’Participatioun um Helperknapp Campus ze verbesseren. An der Projetsaarbecht vum CampuS-Team sinn et d’Kanner, déi haaptsächlech d’Impulser ginn. Déi erwuesse Persounen aus der Schoul an der Maison Relais begleeden de Prozess. An hirer Aarbecht baséieren d’Kanner sech op hir eegen Observatiounen an op de Feedback vun hire Frënn. Si kréien dës Informatiounen individuell oder wärend de Versammlunge vum Klasserot oder vum Klassespriecherrot. D’Zil vum Projet ass, datt d’Membere vum CampuS-Team, souwéi all aner Kanner vum Campus, déi vun den Aktioune profitéieren, hir sozial Fäegkeeten an hir emotional Intelligenz entwéckelen. D’Léiere vun Empathie soll hinnen erméiglechen, engagéiert Persounen ze ginn, déi sech fir d’Wuelbefanne vun hire Matmënschen asetzen.
